//
VEREENIGING. – Ryno van Dam en Stefan Nagel, albei leerlinge aan die HS Overvaal, was op 16 Oktober saam in die motor toe die bestuurder beheer daaroor verloor het. Hulle het eers ‘n lamppaal getref en toe teen ‘n huis se muur tot stilstand gekom.
Phillip Swanepoel, ‘n inwoner van Sonlandpark, is deur SOS Security geskakel om hulp te verleen en het ER24 onmiddellik ontbied. Ryno het ernstige beserings opgedoen en is op die toneel behandel en in ‘n kritieke toestand deur ER24 na Mediclinic Vereeniging geneem. Hy het egter later dieselfde dag aan sy beserings beswyk.
Stefan is in ‘n stabiele toestand ook na Mediclinic Vereeniging geneem en is reeds ontslaan.
Boodskappe het intussen op verskeie Facebook-blaaie van die skool en die gemeenskap van Sonlandpark ingestroom. Familie, vriende en lede van die gemeenskap het ook Maandagaand bymekaar gekom en blomme en brandende kerse neergesit waar die ongeluk gebeur het.
Elkeen wat bystand verleen het, word opreg bedank. Ryno is Donderdag om 10:00 vanuit die Klipkerk in Vereeniging begrawe.
At Caxton, we employ humans to generate daily fresh news, not AI intervention. Happy reading!
