Nuwe fiets gee Chanell vlerke!

Retha Fitchat

VANDERBIJLPARK. – Dit was Maandag, 19 Desember, presies twee jaar sedert die gewilde onderwyseres, begaafde fietsryer, hokkie- en tennisafrigter van die Vaaldriehoek, Chanell Meijer (32), ernstige hoofbeserings opgedoen het toe sy in Beethovenstraat deur ‘n afleweringsvoertuig van haar sportfiets afgestamp is.
Sy is daardie dag, 19 Desember 2014, met ER24 se noodhelikopter na die hospitaal vervoer, waar sy in ‘n kritieke toestand opgeneem is en vir sowat drie maande in ‘n koma was.
Hoewel dokters aanvanklik vir haar lewe gevrees het, het Chanell danksy haar veggees en uitmuntende fisiese toestand, gevorderde mediese behandeling sowel as baie gebede van haar vriende en familie, bewys dat ‘n mens selfs so ‘n lewensbedreigende terugslag te bowe kan kom. Vandag, twee jaar later, maak sy uitstekende vordering en wil graag weer voluit aan sport deelneem.
Volgens Malie van der Walt, een van haar talle sportvriende, is Chanell se deursettingsvermoë en vasberadenheid ‘n inspirasie vir baie sportgeesdriftiges, daarom het ‘n groep vriende onlangs besluit om vir Chanell ‘n fiets aan te skaf sodat sy makliker kan oefen.
Henk Du Plessis, een van haar oefenmaats, het met die idee van ‘n driewielfiets gekom, en met Harry en Christo van Metro Cycle gesels. Malie het begin borge soek en Roelf van Deventer van Site Maintenance & Fabrication Solution het aangebied om vir die fiets te betaal. Japie van Anderson & Kerr en David en Edelweis Willman van Power Plant Hire het ook fininsiële bydraes gemaak wat Chanell in staat sal stel om die res van haar fietsrybenodigdhede aan te koop. Metro Cycle het ook haar kopskerm geborg.
‘n Baie dankbare en opgewonde Chanell kan nou weer haar passie – fietsry – uitleef, terwyl die driewielfiets haar help om haar balans te hou en te bevorder.