’n Fees soos geen ander!

VANDERBIJLPARK. – Die fees, Wheels at the Vaal, het ‘n trotse geskiedenis met die viering van interessante aspekte van ons erfenis en kultuur. Die fees word saamgestel om jonk en oud te pas, ongeag geslag, geloof of politieke oortuiging. Dit is voorwaar ‘n familiegeleentheid. Onthou die feesdatums: vanaf Vrydag 4 tot Sondag 6 September van vroeg tot laat.
Bo en behalwe die vertoon van veteraan- en klassieke voertuie het baie stalletjiehouers hul plekke al bespreek en hulle sien almal daarna uit om besoekers van diens te wees. Daar is ‘n groot verskeidenheid stalletjies en iets vir ‘n ieder en ‘n elk word gewaarborg. ‘n Menigte handwerkers en tuisnyweraars sal ‘n voortreflike lys produkte voorlê. Die lys is lank en fassinerend: kledingstukke en toebehore, T-hempdrukwerk, handsakke, hekel- en naaldwerk, handgemaakte goedere, speelgoed en opvoedkundige hulpmiddels, glaskrale, juweliersware, gesondheidsmiddele, houtwerk, tuisgebak, tuisgemaakte lekkers, blatjange en ingelegde eetgoed, droë vrugte en miniatuur plante. Handelaars van antieke en versamelbare items sal oudhede uitstal.
Miskien is daardie versamelaarstuk waarna jy al so lank soek, versteek tussen die ander items, ‘n mens weet nooit. Baie versamelaars sal verseker tevrede huis toe gaan!
Handelaars van motortoebehore, toerusting en hardeware sal hulle produkte vertoon, baie daarvan vir die eerste keer. Die nuutste tegnologie sal ook te sien wees.
Die hongeres sal hulle kan verlustig in die wye keuse van kosse by die groot verskeidenheid kosstalletjies om elke smaak te pas. Daar’s tradisionele hamburgers, worsbroodjies, hoender- en biefsosaties, kerrie en rys, potjiekos, Indiese kos, vetkoek, pannekoek en veel meer. In die binnehof by die Heritage Museum kan besoekers om tafels kuier met vermaak wat om die uur deur musikante en kunstenaars verskaf word. Wat is lekkerder as om tyd deur te bring met vriende en familie? Vir verdere inligting skakel of SMS 082 492 5214.