Hoe veilig is kinders by die skool?

Ouers wil tog gemoedsrus hê as kinders by die skool afgelaai word. Hulle is mos veilig daar, of nie?

Voglens ‘n verslag van die Vryheidsfront Plus, is daar sedert die begin van die 2020 skooljaar te veel voorvalle waar skoolkinders op ‘n onnatuurlike wyse gesterf het.

“Skole en instansies wat verantwoordelik is vir die veiligheid van skoolkinders en nalaat om hul verpligtinge na te kom, moet ondersoek en vervolg word,” lui die persverklaring.

In die jongste geval is Laticia Jansen (15), ‘n leerling aan die Graceland Education Centre in Elsburg Germiston, dood nadat sy na bewering aangeval en verkrag is. Haar liggaam is twee dae later in ‘n bos naby Elsburg gevind. En moenie dink dat hierdie soort gebeure net buite die Vaaldriehoek gebeur nie. Hier was reeds gevalle waar kinders op die skoolterrein aangeval en selfs verkrag was. In die meeste gevalle word dit eenvoudig net toegesmeer om die skool en ook die kind te beskerm.

Dan is daar ook die gevaar van kinders wat die skoolbus verpas (soms arriveer die busbestuurders voor die tyd), en dan moet die kinders daar staan of begin stap. Albei opsies is gevaarlik en onaanvaarbaar.

“Ouers laat hul kinders in die sorg van skole en instansies waar hulle veilig behoort te wees. In dié geval was dit ‘n doodsvonnis. Dit kan nie geduld word nie. Mense moet verantwoordelik gehou word vir hul dade,”sluit die persvrystelling af.