Kerswense aan al ons lesers

Die jaar het verby gevlieg. Vandag is dit Kersfees en oor ‘n paar dae is dit Nuwejaar … 2020 wink!

Die Vaalweekbladspan wens al ons getroue lesers ‘n vreugdevolle Kersfees toe saam met hul geliefdes. Ook aan die lesers wat deur die jaar moontlik ‘n geliefde aan die dood moes afstaan. Ons dink aan julle in hierdie tyd en hoop dat daardie leemte gevul sal word met liefde en ondersteuning deur vriende en familie.

Aan die einde van elke jaar dink mens maar altyd terug aan die hoogte- en laagtepunte. Die Vaaldam is te leeg, die slaggate is te veel, kinderontvoering het soos ‘n nuwe mode in SA kop uitgesteek, plaasmoorde word nie gestop nie en beurtkrag maak inwoners boos … om maar net ‘n paar te noem.

Vir die Vaalweekblad-joernaliste wat oor die goeie en hartseertye moet berig, was dit ‘n besondere jaar van beproewing. Die Driehoek-tragedie was beslis die hartseerste voorval wat vanjaar in die Vaalriehoek afgespeel het. Ons dink vandag in besonder aan die ouers en maats wat hierdeur geraak is.

Baie inwoners moes persoonlike uitdagings oorbrug en Vaalweekblad is trots op elkeen wat sy bes probeer het om dit te vermag, al was dit dalk nie 100% suksesvolg nie. Onthou 2020 bied nuwe uitdagings en geleenthede.

• Hou moed en geniet Kersdag met die wete dat God die mensdom so lief gehad het dat Hy Sy enigste Seun vir ons gestuur het.