Bownes breek hekkies Wêreldrekord

Potchefstroom se Olimpiese hekkiesatleet en statebondspele gouemedaljewenner, Shaun Bownes, het weer onlangs bewys dat hy op die ouderdom van 45 nog steeds blitsvinnig in die 110 meter hekkies is.

Sy wêreldrekord van 14.37 in die mans meesteratletiekkategorie van 45-49 het dit in swart op wit bevestig.

Bownes het hierdie rekord op die Pilditch-stadion in Pretoria behaal tydens die Gauteng-Noord se Meesterskampioenskap.

“Ek is bly en dankbaar en dit is vir my ‘n bonus om die wêreldrekord te kry.

“Ek geniet dit om nog op my ouderdom te kan deelneem en die ander ouens uit te daag,” noem hy.

Bownes spandeer deesdae meer van sy tyd op die baan as atletiekafrigter, maar dit keer hom glad nie om ook saam met sy atlete te hardloop en ‘n meer direkte aanslag te hê nie.

“Dit is lekker om betrokke te bly en ek geniet afrigting ook verskriklik. “Dit is belangrik om daardie passie aan die brand te hou. Meesteratletiek is lekker in daardie sin ook. Daar is kompetisie maar dit is meer ontspanne en ‘n heel ander benadering as topvlak senior atletiek.” Bownes het nou nog drie wedlope oor dié jaar om sy wêreldrekord te probeer verbeter met die SA Meesterskampioenskappe wat op 13 en 14 Mei in Pretoria plaasvind.

Lees hierdie onderhoud wat Potchefstroom Herald met Shaun Bownes verlede jaar gedoen het.