Moeder van wyle Wimpie Koekemoer sê dankie
Gewilde karaoke-sanger sterf twee dae na aanranding
Mev. Valerie Lottering, moeder van die gewilde karaoke-sanger Wimpie Koekemoer wat op 30 Oktober gesterf het, skryf:
Hiermee wil ek vir almal baie dankie sê vir die bystand en ondersteuning tydens die afsterwe van Wimpie.
Wimpie is Vrydagaand, 27/28 Oktober aangerand by Oki Doki Pub & Grill in Vanderbijlpark. Hy is Maandagmiddag, 30 Oktober, breindood verklaar en het Maandagaand omstreeks 11 uur aan sy beserings gesterf. Daar is binne twee dae ‘n fondsinsameling by Route 66 gereël. Aan almal wat betrokke was by die reëlings, ‘n baie groot dankie. Daar is genoeg ingesamel vir alle onkostes vir die roudiens op 8 November.
Ek gaan niemand uitsonder nie, almal was lief vir Wimpie en hy was baie gewild. Al sy vriende en ons familie gaan hom baie mis. Baie dankie aan almal wat ook ‘n bydrae gemaak het met borde eetgoed. Die ondersteuning was ongelooflik. Ek ken nie almal van julle nie, maar my dankie kom diep uit my hart en ek sal dit nooit vergeet nie.
